Major Cher Cha Vang Collection
———————————
NWS LUB NEEJ—niam thiab txiv yug tau lawv 8 leej tub 9 leeg ntxhais. hnub qub 5 Txawj Tsab Vaj muaj 1 tug tij laug 3 tug kwv tau tag sim neej rau ntsug rog Nyab Laj xyoo 1961-75. hnub qub 5 Txawj Tsab Vaj nws muaj 3 tug poj niam. niam hlob muaj 2 leeg tub 2 leeg ntxhais, niam hlob thiab 2 tug ntxhais poob rau Nplog Teb xyoo 1975 lawm. niam nrab muaj 6 leej tub 5 leeg ntxhais, niam yau muaj 1 leeg tub 3 leeg ntxhais. Tag nrho hnub qub 5 Txawj Tsab cov me nyuam thiab 3 tug niam muaj 23 leeg.
Hais txog yawg hlob hnub qub 5 Txawj Tsab Vaj txoj kev tiv thaiv lub Teb Chaws thiab pab tej nom tswv yav tag dhau los thaum nyob rau hauv Teb Chaws nplog xyoo 1951-1953 hnub qub 5 Txawj Tsab Vaj ua tub rog Fab Kis nyob rau Xeev Xieng Khouang. Xyoo 1959-63 hnub qub 5 Txawj Tsab Vaj ua tub rog nplog nyob rau BV/23 koos thav nplog. Xyoo 1964-1975 hnub qub 5 Txawj Tsab los ua tub rog SgU tiv thaiv lub Teb Chaws nplog thiab pab america thaiv tsis pub cov tub rog kooj sam hla txoj kev Ho Chi Minh Trail tuaj mus rau sab nyab Laj Qab Teb. Thaum lub 2/1962 hnub qub 5 Txawj Tsab thiab hnub qub 4 npliaj Kaub Vaj nkaws tau coj 1 pab tub rog li 24 leeg khiav tawm hauv BV/23 koos thav nplog los nrog nais Phoo Vaj Pov nyob rau hauv Looj Ceeb, vim lub sij hawm no tsov rog loj zuj zus tuaj lawm, tag nrho cov tub rog feem ntau mus nyob tom tshav rog tiv thaiv lub teb chaws tag lawm. nais Phoo Vaj Pov thiaj kom hnub qub 5 Txawj Tsab Vaj thiab hnub qub 4 npliaj Kaub nkaws coj cov tub rog los saib nais Phoo 2 lub chaws ua kam hauv Looj Ceeb thiab nram Vees Cam, thiab ua zaub mov xa mus rau cov tub rog nyob tom tshav rog kom lawv tau noj, tsis tag li xwb tseem raug mus zov tej roob ib cheeb tsam ncig ntawm lub nroog Looj Ceeb tib si thiab. Xyoo 1965 nais Phoo Vaj Pov thiaj muab hnub qub 5 Txawj Tsab Vaj los ua tus saib xyuas kev ruaj ntseg rau nws tsev neeg thiab tuav txoj hauj lwm txais tos cov nom tswv.
Tom qab xyoo 1970 hnub qub 4 npliaj Kaub nws muaj hnub nyoog nws mus so kam lawm. nais Phoo Vaj Pov thiaj muab hnub qub 5 Txawj Tsab Vaj los tuav tag nrho cov tub rog saib xyuas kev ruaj ntseg rau nais Phoo Vaj Pov nyob Looj Ceeb thiab Vees Cam. Tom qab thaum lub 3/72 hnub qub 5 Txawj Tsab Vaj raug nce mus tuav nyob rau huav GM/23 uas muaj hnub qub 5 Lee Teng ua tus thawj thaum ntaws hnub qub 5 Txawj Tsab Vaj thiaj muab hnub qub 3 Xaiv nus Vaj los tuav cov tub rog saib yuas kev ruaj ntseg rau nais Phoo Vaj Pov nyob rau Looj Ceeb thiab nram Vees Cam txog xyoo 1975 poob teb chaws.
Tom qab xyoo 1975 poob teb chaws hnub qub 5 Txawj Tsab Vaj tau ua neeg thoj nam tawg rog tuaj nyob rau Teb Chaws Thaib tau 5 lub xyoos, hnub qub 5 Txawj Tsab Vaj pom hais tias lub neej nyob rau Teb Chaws Thaib yuav tsis kawg, nws thiaj txiav txim siab coj nws tsev neeg tuaj pib lub neej tshiab rau Teb Chaws america xyoo 1980. Thaum xyoo 1982 hnub qub 5 Txawj Tsab Vaj thiaj mus kawm tiav ua ib tug Farmer cog qoob cog loo los tau ntau xyoo, tsis tag li ntaws xwb hnub qub 5 Txawj Tsab Vaj tseem yog peb hmoob Minnesota 1 tug zoo thawj neeg tseem ceeb rau txoj kev sab laj txhim kho lub neej Hmoob, thiab xyoo 1995 nais Phoo Vaj Pov tseem muab hnub qub 5 Txawj Tsab tsa ua tus thawj tuav tag nrho cov advisory rau nais Phoo Vaj Pov nyob hauv lub koom haum tso teb chaws, tom qab thaum lub 1 hlis xyoo 2011 nais Phoo Vaj Pov tau tso peb tsoom hmoob tseg lawm, hnub qub 5 Txawj Tsab tseem raug peb Hmoob Minnesota tsaws rau qhov chaws siab.
Vim ib txwm nws yog tus nyob ntawm nais Phoo Vaj Pov xub ntiag, tsis hais thaum tseem nyob rau Teb Chaws nplog, los yog nyob Teb Chaws america no. hais txog li ntawm yawg hlob hnub qub 5 Txawj Tsab Vaj txoj kev ua ib tug thawj coj nws yog ib tug neeg hais lus tsawg, tab sis muaj ntsiab lus tseem ceeb ntau nws yog tus neeg hais lus nyob nrub nrab tsis pub khib leej twg, nws muaj tus cuj pwm ua siab ntev qhuab qhia kom suav daws txawj sib hlub thiab paub sib hais, nws lub siab nyob nrog nraim nws tej kwv tij phooj ywg thiab tsoom Hmoob, hnub qub 5 Txawj Tsab Vaj yog ib tug neeg siab sib zog muag, yog leej twg hais txog lawm nws yeej khiav khuav mus pab tam sim ntaws, tsis tag li ntaws xwb, hnub qub 5 Txawj Tsab Vaj tseem yog 1 tug neeg txhawb nqa peb hmoob tej koom haum los yam tsis tu ncua thiab hais lus qhuab qhia kom tej tub txawj ntxhais ntse txawj sib pab los coj peb tsoom hmoob lub neej kom txawj loj hlob ruaj khov mus rau txoj kev vam meej.
Minneapolis, Minnesota
2013
